ᐊᑐᐃᓐᓇᖃᕐᓂᖅ ᓂᕿᑦᑎᐊᕙᒻᒧᑦ ᐊᒻᒪ ᐊᑭᑐᓗᐊᓐᖏᑦᑐᓄᑦ ᓂᕿᓄᑦ ᐊᒃᓱᕈᕐᓇᖅᓯᒪᓕᕐᒪᑦ ᓄᓇᕗᒻᒥᐅᓄᑦ ᐊᕐᕋᒍᒐᓴᓐᓄᑦ, ᐊᒻᒪ ᑕᒪᓐᓇ ᓴᖅᑭᖅᓯᒪᓕᕐᒪᑦ ᑕᒪᒃᑯᓄᖓ ᓂᕈᐊᖅᑕᐅᓯᒪᔪᓄᑦ ᐃᓱᒫᓗᒍᑎᒋᔭᐅᒻᒪᕆᑦᑐᓂ ᐊᒻᒪ ᐃᓄᓐᓄᑦ.
2009-ᖑᑎᓪᓗᒍ, ᓄᓇᕗᑦ ᒐᕙᒪᒃᑯᖏᑦ ᓴᖅᑮᓚᐅᖅᑐᑦ ᑎᑎᖃᖅᓯᒪᔪᒥᒃ ᓇᓗᓇᐃᖅᓯᓯᒪᔪᒥᒃ ᓯᕗᓪᓕᐅᔾᔭᐅᖁᔭᐅᔪᓂᒃ, ᑕᒪᑉᑕ, ᓇᓗᓇᐃᖅᓯᓯᒪᓪᓚᕆᑦᑐᑎᒃ ᐱᒻᒪᕆᐅᓂᖏᓐᓂᒃ ᐊᖑᒻᒪᑎᓂᕐᒧᑦ ᐃᓅᓇᓱᐊᕈᑕᐅᔪᓐᓇᖅᑐᓂᒃ ᓄᓇᕗᒻᒥᐅᓄᑦ, ᐱᖃᓯᐅᑎᓪᓗᒋᑦ ᐊᑭᑐᐊᓗᓐᖏᑦᑐᒥᒃ, ᓂᕿᑦᑎᐊᕙᐅᔪᓂᒃ. ᐃᓚᒋᓪᓗᓂᒋᑦ ᑕᒪᒃᑯᐊ ᓯᕗᓪᓕᐅᔾᔭᐅᖁᔭᐅᔪᑦ, ᓄᓇᕗᑦ ᒐᕙᒪᒃᑯᖏᑦ ᐅᖃᓚᐅᖅᑐᑦ ᐅᐸᓗᖓᐃᔭᐃᓂᐊᕋᒥᒃ ᐊᒻᒪ ᐊᑐᓕᖅᑎᑦᑎᒋᐊᕐᓗᑎᒃ ᖃᓄᖅ ᐊᔪᖅᓴᓗᐊᓐᖏᓐᓂᖅᓴᐅᓕᕈᑎᒃᓴᒥᒃ ᐅᐸᓗᖓᐃᔭᐅᑎᐅᔪᒥᒃ.
2010-2011−ᖑᑎᓪᓗᒍ, ᓄᓇᕗᒻᒥ ᑲᑎᒪᕐᔪᐊᕐᓂᐅᓚᐅᖅᑐᖅ ᐊᔪᖅᓴᓗᐊᖅᑕᐃᓕᒪᑎᑦᑎᓂᕐᒧᑦ ᐃᓄᓐᓂᒃ ᐅᖃᖃᑎᖃᖃᑦᑕᒻᒪᕆᓚᐅᕐᒪᑕ ᑐᓴᖅᑎᑦᑎᓇᓱᐊᖅᑐᑎᒃ ᖃᓄᖅ ᐊᔪᖅᓴᓗᐊᖅᑕᐃᓕᒪᓂᕐᒧᑦ ᐸᕐᓇᒍᑕᐅᔪᒥᒃ. ᑕᒪᓐᓇ ᐱᖃᓯᐅᔾᔨᒪᐅᖅᑐᖅ ᑐᑭᓯᓇᓱᐊᖅᑐᑎᒃ ᖃᓄᖅ ᖃᐅᔨᖃᑦᑕᖅᓯᒪᒻᒪᖔᑕ ᓂᕆᔭᒃᓴᖃᖅᐸᖏᓐᓄᑦ ᓄᓇᕗᒻᒥᐅᑦ. ᑕᐃᒪᓕ ᓴᖅᑮᓕᓚᐅᖅᑐᑦ ᐊᔪᖅᓴᓗᐊᖅᑕᐃᓕᒪᓂᕐᒧᑦ ᐅᐸᓗᖓᐃᔭᕈᑕᐅᔪᒥᒃ. ᒪᑭᒪᓂᕐᒧᑦ ᐸᕐᓇᒍᑕᐅᔪᖅ: ᑲᑐᔾᔨᓪᓗᑎᒃ ᐱᓕᕆᐊᖑᔪᖅ ᐊᔪᖅᓴᓗᐊᖅᑕᐃᓕᓂᕐᒧᑦ, ᑎᓕᐅᕆᓪᓗᑎᒃ “ᑕᐃᒃᑯᓂᖓ ᓯᕗᒃᑲᑕᖅᑎᐅᓪᓗᐊᑕᖅᑐᓂᒃ ᑲᒪᒋᔭᖃᖅᑐᓂᒃ ᓂᕿᒃᓴᖅᑕᖃᖁᓪᓗᒋᑦ ᐱᓕᕆᖃᑎᒌᑦᑎᐊᓂᖅᓴᐅᓪᓗᑎᒃ ᐃᑲᔪᖅᑕᐅᑦᑎᐊᕈᓐᓇᓂᐊᖅᓴᐅᓂᐊᕐᒪᑕ ᓄᓇᕗᒻᒥᐅᑦ.” ᒪᑭᒪᓂᕐᒧᑦ ᐸᕐᓇᒍᑕᐅᔪᖅ ᐱᖃᓯᐅᔾᔨᓚᐅᖅᑐᖅ ᐊᖏᖅᓯᒪᓂᖃᖅᑐᑎᒃ “ᓴᖅᑮᓂᐊᖅᑐᒍ ᓄᓇᕗᒻᒥᐅᑦ ᓂᕿᒃᓴᖃᖁᓪᓗᒋᑦ ᑲᑐᔾᔨᖃᑎᒌᓂᒃ... ᐊᒻᒪ ᐋᖅᑭᓗᑎᒃ ᓄᓇᕗᒻᒥ ᖃᓄᖅᑑᕐᓂᐊᖅᑐᒥᒃ ᓂᕆᔭᒃᓴᖅᑕᖃᖁᓪᓗᒍ.”
ᓄᓇᕗᒻᒥ ᓂᕿᒃᓴᖃᕆᐊᖃᕐᓂᕐᒧᑦ ᑲᑐᔾᔨᖃᑎᒌᑦ ᓴᖅᑭᓯᒪᔪᖅ ᑕᒪᒃᓱᒪᓐᖓᑦ ᐊᖏᕈᑕᐅᓯᒪᔪᒥᒃ.