ᓄᓇᕗᒻᒥ ᓂᕿᖃᐃᓐᓇᖅᑎᑦᑎᓇᓱᖕᓂᕐᒧᑦ ᑲᑎᒪᕕᒡᔪᐊᕐᓂᖅ ᐊᑐᓚᐅᖅᑐᑦ ᐊᕐᕌᒍᑕᒫᖅᓯᐅᑦ ᑕᐅᑐᖃᑦᑕᐅᑎᓪᓗᑎᒃ ᑲᑎᒪᓂᕐᒥ ᐃᖃᓗᖕᓂ ᒫᑦᓯ 17-ᒥ 19-ᒧᑦ, 2015.
ᒪᑐᐃᕈᑕᐅᔪᑦ ᐊᑐᐊᓂᒃᑎᓪᓗᒋᑦ ᑲᑎᒪᓂᕐᒥ ᐃᓚᐅᑎᑦᑎᔪᑦ:
1. ᐊᖏᕈᑎᒋᓪᓗᒍ ᐱᓕᕆᐊᒃᓴᑦ ᓇᓗᓇᐃᖅᑕᐅᓯᒪᔪᑦ
ᐱᓕᕆᐊᒃᓴᑦ ᓇᓗᓇᐃᖅᑕᐅᓯᒪᔪᑦ ᑐᑭᓯᓇᖅᓯᒃᑲᓐᓂᖅᑎᑦᑎᓂᐊᖅᑐᖅ ᐱᓇᓱᐊᒐᕐᒥᑦ, ᐃᖅᑲᓇᐃᔮᓂᑦ, ᑲᒪᒋᔭᕆᐊᖃᖅᑐᓂᒡᓗ ᑲᑎᒪᕕᒡᔪᐊᕐᓂᕐᒥ; ᑐᑭᒧᐊᒃᑎᑦᑎᓗᑎᒃ ᖃᓄᖅᑑᕐᓂᕐᒥᑦ ᐱᔾᔪᑎᒋᓗᒍ ᐃᓚᒋᔭᐅᖃᑕᐅᓂᖅ; ᐊᒻᒪᓗ ᓇᓗᓇᐃᕐᓗᒍ ᖃᓄᖅ ᑲᑎᒪᕕᒡᔪᐊᕐᓂᕐᒥ ᐃᓚᒋᔭᐅᖃᑕᐅᔪᑦ ᐃᖅᑲᓇᐃᔭᖃᑎᒌᖕᓂᐊᕐᒪᖔᑕ ᐊᑕᐅᑦᑎᒃᑯᑦ.
ᑲᑎᒪᕕᒡᔪᐊᕐᓂᖅ ᐱᑎᑦᑎᓂᐊᖅᑐᖅ ᐱᓕᕆᐊᒃᓴᑦ ᓇᓗᓇᐃᖅᑕᐅᓯᒪᔪᑦ ᑭᒃᑯᑐᐃᓐᓇᕐᓄᑦ ᐊᑐᐃᓐᓇᐅᑎᑕᐅᓗᑎᒃ ᑲᑎᒪᕕᒡᔪᐊᕐᓂᕐᒥ ᐃᓚᐅᖃᑕᐅᔪᑦ ᐱᕕᖃᓚᐅᖅᑎᓪᓗᒋᑦ ᐊᑎᓕᐅᕐᓂᕐᒥᑦ.
2. ᐊᖏᕈᑎᒋᓪᓗᒍ ᑲᑎᒪᕕᒡᔪᐊᕐᓂᕐᒥᑦ ᐋᖅᑭᒃᓯᒪᓂᖓ ᐊᑯᓂᐅᖏᑦᑐᒃᑯᑦ ᓂᕿᓄᑦ ᑭᖑᕝᕖᕈᑕᐅᓇᓱᒃᑐᓄᑦ
ᑲᑎᒪᕕᒡᔪᐊᕐᓂᕐᒥᑦ ᑭᐅᓪᓗᑎᒃ ᐊᑯᓂᐅᔪᒃᑯᑦ ᐊᓯᔾᔨᕈᑎᒃᓴᓂᑦ ᐱᔭᕆᐊᖃᖅᑎᑕᐅᔪᑦ ᐊᑐᖅᑎᑦᑎᓂᕐᒥᑦ ᐱᔾᔪᑕᐅᓪᓗᐊᑕᖅᑐᓂᑦ ᓂᕿᖃᑦᑎᐊᖏᓐᓂᕐᒧᑦ, ᑭᓯᐊᓂ ᐊᑯᓂᐅᖏᑦᑐᒃᑯᑦ ᓂᕿᓄᑦ ᑭᖑᕝᕖᕈᑕᐅᓇᓱᒃᑐᑦ ᐱᔭᕆᐊᖃᖅᑐᑦ ᒫᓐᓇᐅᔪᖅ. ᑲᑎᒪᕕᒡᔪᐊᕐᓂᖅ ᐅᒃᐱᕈᓱᒃᑐᖅ ᐱᓇᓱᖕᓃᑦ ᐃᑲᔪᖅᓱᐃᓂᕐᒧᑦ ᓂᕿᓄᑦ ᑭᖑᕝᕕᕈᑏᑦ ᓄᓇᕗᒻᒥ ᐊᔾᔨᖃᕆᐊᖃᖅᑐᑦ ᓄᓇᕗᒻᒥ ᐃᓗᓕᖏᓐᓂ ᑐᑭᓕᕇᓕᖅᑎᓪᓗᒍ ᓄᓇᕗᒻᒥ ᓂᕿᖃᐃᓐᓇᖅᑎᑦᑎᓇᓱᖕᓂᕐᒧᑦ ᑐᑭᒧᐊᕈᑎᒃᓴᑦ. ᑲᑎᒪᕕᒡᔪᐊᕐᓂᖅ ᐃᒃᐱᒍᓱᒃᑐᑦ ᓲᕐᓗ ᓯᓚᑖᓂᑦ ᐃᑲᔪᖅᓱᖅᑕᐅᓂᖅ ᑐᑭᒧᐊᒃᑎᑕᐅᔭᕆᐊᓕᒃ ᓄᓇᓕᐅᔪᓂᑦ ᐱᓇᔪᒃᑐᓄᑦ, ᐊᒻᒪ ᑐᓂᓯᒪᑦᑎᐊᕐᖢᑎᒃ ᐱᕙᓪᓕᐊᑎᑦᑎᓂᕐᒥᑦ ᐱᑕᖃᐅᕐᑐᓂᑦ ᐃᓂᖃᕐᑎᓪᓗᒋᑦ ᐱᓕᕆᖃᑎᒌᖕᓂᕐᒥᑦ.
ᑲᑎᒪᕕᒡᔪᐊᕐᓂᖅ ᐱᑎᑦᑎᓂᐊᖅᑐᖅ ᑭᒃᑯᑐᐃᓐᓇᕐᓄᑦ ᐊᑐᐃᓐᓇᐅᑎᑦᑎᓗᑎᒃ ᐃᓂᐅᔪᓂᑦ ᐱᔭᕇᖅᐸᑦ ᐃᓗᓕᒃᓴᖏᑦ ᐊᖏᖅᑕᐅᓂᕐᒧᑦ ᑭᖑᓪᓕᕐᒥ ᑕᖅᑭᑕᒫᑦ ᑲᑎᒪᓚᐅᖅᑎᓪᓗᒋᑦ.
3. ᐊᖏᖃᑎᒌᖕᓂᖅ ᐃᖅᑲᓇᐃᔭᖃᑎᒌᖕᓂᕐᒥᑦ ᑭᒡᒐᖅᑐᐃᓗᑎᒃ ᐱᐅᓯᒋᐊᕈᑎᒃᓴᓂᑦ ᓂᕿᑦᑎᐊᕙᓕᕆᓂᕐᒧᑦ ᐅᑭᐅᖅᑕᖅᑐᒥ ᑲᓇᑕᒥ ᐱᓕᕆᐊᒃᓴᖓᓂ
ᑲᑎᒪᕕᒡᔪᐊᕐᓂᕐᒥ ᐃᓚᒋᔭᐅᔪᑦ ᑕᐅᖅᓯᖃᑎᒌᒃᖢᑎᒃ ᑕᐅᑐᙳᐊᖅᑕᖏᓐᓂᑦ ᓂᕿᑦᑎᐊᕙᓕᕆᓂᕐᒧᑦ ᐅᑭᐅᖅᑕᖅᑐᒥ ᑲᓇᑕᒥ ᐱᓕᕆᐊᒃᓴᖓᓂ.
ᑲᑎᒪᕕᒡᔪᐊᕐᓂᖅ ᓴᖅᑭᑎᑦᑎᓂᐊᖅᑐᑦ ᓂᕿᑦᑎᐊᕙᒃ ᑲᑎᒪᔨᕋᓛᑦ ᐅᓂᒃᑳᖓ ᓂᕿᑦᑎᐊᕙᓕᕆᓂᕐᒧᑦ ᐅᑭᐅᖅᑕᖅᑐᒥ ᑲᓇᑕᒥ ᐱᓕᕆᐊᒃᓴᖅ, ᑐᓂᓯᓪᓗᓂ ᐊᑐᓕᖁᔨᔾᔪᑎᓂᒃ ᐱᐅᓯᒋᐊᕐᑎᓐᓂᕐᒧᑦ ᐱᓕᕆᐊᒃᓴᖅ ᐊᑲᐅᓂᖅᓴᒧᑦ ᐊᑐᕈᓐᓇᕐᓗᓂ ᐱᔭᕆᐊᖃᖅᑕᖏᓐᓂᑦ ᓄᓇᕗᒻᒥᐅᑦ.
ᑲᑎᒪᕕᒡᔪᐊᕐᓂᖅ ᐋᖅᑭᒃᓯᓂᐊᖅᑐᖅ ᐃᖅᑲᓇᐃᔭᖃᑎᒌᓂᑦ ᕿᒥᕐᕈᓂᐊᖅᑐᓂᑦ ᐅᓂᒃᑳᒥᑦ ᐊᑐᓕᖁᔨᔾᔪᑎᓂᑦ ᖃᐅᔨᓗᑎᒃᓗ ᓴᖅᑭᑉᐸᓪᓕᐊᔪᓂᑦ ᐱᔾᔪᑎᓂᑦ, ᐃᓚᐅᖃᑕᐅᓗᑎᒡᓗ ᓂᕿᑦᑎᐊᕙᓕᕆᓂᕐᒧᑦ ᐅᑭᐅᖅᑕᖅᑐᒥ ᑲᓇᑕᒥ ᐅᖃᐅᔾᔨᒋᐊᖅᑏᑦ ᑲᑎᒪᔨᓂᑦ ᑖᒃᑯᓇᙵᑦ ᐊᑐᓕᖁᔨᔾᔪᑎᓂᑦ ᐱᔾᔪᑎᓂᒡᓗ ᐊᔪᕐᓇᕈᓐᓃᑐᐊᕌᖓᑦ.
4. ᐃᓚᐅᖃᑕᐅᓪᓗᑎᒃ ᑭᒃᑯᑐᐃᓐᓇᕐᓄᑦ ᐊᑐᐊᒐᓂᑦ ᑲᑎᒪᓂᕐᒥᑦ ᐃᖃᓗᖕᓂ ᑲᑎᒪᑎᑦᑎᑎᓪᓗᒋᑦ ᓂᕿᖃᑦᑎᐊᖅᑎᑦᑎᓇᓱᖕᓂᕐᒧᑦ ᐅᑭᐅᖅᑕᖅᑐᒥ ᑲᓇᑕᒥ
ᑲᑎᒪᕕᒡᔪᐊᕐᓂᕐᒥ ᐅᖃᖃᑎᒌᒃᖢᑎᒃ ᑭᓱᑦ ᐃᓕᓐᓂᐊᕈᑏᑦ ᐃᓕᑕᐅᔪᓐᓇᕐᒪᖔᑕ ᐊᑐᓕᖅᑎᑕᐅᔪᓂᑦ ᓄᓇᕗᒻᒥ ᓂᕿᖃᐃᓐᓇᖅᑎᑦᑎᓇᓱᖕᓂᕐᒧᑦ ᑐᑭᒧᐊᕈᑎᒃᓴᓂᑦ, ᑭᓱᑦ ᐊᑐᓕᖅᑎᑕᐅᔪᑦ ᓇᓗᓇᐃᖅᓯᖕᒪᖔᑕ ᑲᔪᓯᑦᑎᐊᕐᓂᕐᒥᑦ, ᑭᓱᑦ ᑐᓗᕈᑏᑦ ᓴᖅᑭᑕᐅᖏᓐᓇᕐᒪᖔᑕ, ᐊᒻᒪ ᕿᓲᓇᔭᖅᐸ ᒪᑐᐃᕈᑎᑦ ᑕᐅᑐᒃᑕᐅᓪᓗᐊᑕᖅᑐᓄᑦ ᑐᑭᓕᐊᖅᓯᑎᑦᑎᓂᕐᒥᑦ ᓯᕗᓂᑦᑎᓐᓂ ᑲᑎᒪᖃᑎᒌᖃᑦᑕᕐᓂᕐᓂᑦ.
ᑲᑎᒪᕕᒡᔪᐊᕐᓂᕐᒥ ᑭᒡᒐᖅᑐᐃᔨᑦ ᐃᓚᐅᖃᑕᐅᓂᐊᖅᑐᑦ ᑭᒃᑯᑐᐃᓐᓇᕐᓄᑦ ᐊᑐᐊᒐᓂᑦ ᑲᑎᒪᓂᕐᒥᑦ ᐋᑐᕚᒥ ᑲᑎᒪᑎᑦᑎᑎᓪᓗᒋᑦ ᐊᐃᕆᓕ 20, 2015-ᒥ.
