ᑐᒃᓯᕋᐅᓯᐅᕈᒪᔪᓂᒃ ᕿᓂᕐᓂᖅ – ᓂᕿᖃᑦᑎᐊᖅᑎᑦᑎᓂᕐᒧᑦ ᑐᕌᖓᔪᑦ

ᓄᓇᕗᒻᒥ ᓂᕿᖃᐃᓐᓇᑎᑦᓯᓂᕐᒧᑦ ᑲᑎᒪᔩᑦ ᒫᓐᓇ ᓄᓇᕗᒻᒥ ᑮᓇᐅᔭᖅᓯᐅᖅᑐᓂᒃ ᑐᓐᖓᓱᒃᑎᑦᑎᕗᑦ ᑮᓇᐅᔭᑦ ᐊᑐᖅᑕᐅᓂᐊᖅᐸᑕ ᓂᕿᒃᓴᖃᑦᑎᐊᕐᓂᕐᒧᑦ ᑐᕌᖓᔪᓄᑦ 2017-2018 ᐊᕐᕌᒍᐊᓂ.

 

ᑮᓇᐅᔭᓕᐅᕋᓱᐊᖅᑎᐅᓐᖏᑦᑐᑦ ᑲᑐᔾᔨᖃᑎᒌᑦ ᐊᒻᒪ ᓱᓴᐃᔭᑏᑦ, ᐊᒻᒪ ᓄᓇᓕᖕᓂ ᒐᕙᒪᒃᑯᑦ ᑎᒥᖁᑎᖏᑦ ᓂᕿᖃᑦᑎᐊᖅᑎᑦᑎᓂᕐᒥᒃ ᐱᓕᕆᐊᖃᖃᑦᑕᖅᑐᑦ ᑖᒃᑯᓇᓐᖓᑦ ᑮᓇᐅᔭᓂᒃ ᐱᓇᓱᒍᓐᓇᖅᑐᑦ ᐃᒪᐃᑦᑐᓄᑦ ᐊᑐᕐᓂᐊᖅᐸᑕ:

 

• ᓂᕿᖃᖅᑎᑦᑎᓂᕐᒧᑦ ᑐᕌᖓᔪᒥᒃ ᖃᓄᐃᓕᐅᕈᒻᒥᒃ ᐱᕙᓪᓕᐊᑎᑦᑎᔾᔪᑎᒋᓗᒍ ᐊᒻᒪ/ᐅᕝᕙᓘᓐᓃᑦ ᑲᔪᓯᑏᓐᓇᕈᑕᐅᓗᑎᒃ ᒫᓐᓇ ᓴᖅᑭᔮᖅᐸᒌᖅᑐᓄᑦ;
• ᓄᓇᖅᑲᑎᒥᓂᒃ ᑕᒪᑐᒧᖓ ᐱᓕᕆᐊᖑᔪᒧᑦ ᐃᓚᐅᑎᑦᑎᓗᓂ; ᐊᒻᒪ
• ᓂᕿᓂᒃ ᐊᑐᐃᓐᓇᖃᕐᓂᕐᒧᑦ ᐊᐳᖅᑕᐅᑕᐅᖃᑦᑕᖅᑐᑦ ᒥᒃᖠᒋᐊᕐᓗᒋᑦ.

 

ᐱᓕᕆᐊᖑᔪᒪᔪᑦ ᐃᓕᓐᓂᐊᕐᓂᓕᕆᓂᕐᒥᒃ ᐃᓗᓕᓖᑦ ᓯᕗᓪᓕᐅᔾᔭᐅᓂᐊᖅᑐᑦ, ᓲᕐᓗ ᐃᖅᑲᓇᐃᔮᖑᔪᓐᓇᖅᑐᒥᒃ ᐃᓕᓐᓂᐊᖅᑐᓄᑦ ᐊᒻᒪ ᐱᓕᒻᒪᒃᓴᖅᑐᓄᑦ.

 

ᑖᒃᑯᓄᖓ ᑐᒃᓯᕋᐅᑎᓂᒃ ᑕᑕᑎᕆᐊᓕᖕᓂᒃ ᐱᔪᒪᒍᕕᑦ, ᖃᐅᔨᒋᐊᕐᕕᒋᔪᓐᓇᖅᑕᐃᑦ ᑖᒥ ᐴᑎᓯᓕᔭᐃ, ᐅᑭᐅᖅᑕᖅᑐᒥ ᓂᕿᖃᐃᓐᓇᖅᑎᑦᓯᓂᕐᒧᑦ ᑐᑭᒧᐊᒃᑎ, ᖃᕆᓴᐅᔭᒃᑯᑦ ᑐᕌᕈᑖ TBoutilier@gov.nu.ca ᐅᕝᕙᓘᓐᓃᑦ ᐅᖄᓚᕕᒋᓗᒍ ᐅᕗᖓ (867) 975-5213.

 

ᖃᐅᔨᒪᓂᐊᖅᐳᑎᑦ ᑐᒃᓯᕋᐅᑎᑎᑦ ᑐᓂᓯᒪᔭᕆᐊᖃᕐᓂᐊᖅᑕᑎᑦ ᔫᓂ 26, 2017−ᒥ, 5−ᒧᐊᓚᐅᖅᑎᓐᓇᒍ ᐅᓐᓄᓴᒃᑯᑦ (ᐅᖅᑯᕐᒥᐅᑦ ᓯᕿᕐᖑᔭᖓᒍᑦ).

 

ᓄᓇᕗᒻᒥ ᓂᕿᖃᐃᓐᓇᑎᑦᓯᓂᕐᒧᑦ ᑲᑎᒪᔩᑦ ᐃᒃᓯᕚᖅᑎᖃᐅᖅᐳᑦ ᒐᕙᒪᒃᑯᑦ ᐱᓕᕆᕝᕕᖏᓐᓂᓐᖔᖅᑐᓂᑦ, ᐃᓄᐃᑦ ᑎᒥᖁᑎᖏᓐᓂᑦ, ᒐᕙᒪᐅᓐᖏᑦᑐᑦ ᑎᒥᖁᑎᖏᓐᓂ ᐊᒻᒪ ᐃᒻᒥᒃᑯᑦ ᐱᓯᓂᓯᖃᖅᑐᓂᑦ, ᑖᒃᑯᐊ ᑲᑐᔾᔨᖃᑎᒌᒃᖢᑎᒃ ᓂᕿᓂᒃ ᐊᑐᐃᓐᓇᕈᐃᒃᑲᓐᓂᕋᓱᒃᑎᐅᔪᑦ ᓄᓇᕗᒻᒥ.